BELLE-POESIE.COM

Kè m’pa ka pale
Men l’toujou gen pou l’ di
Li rann bouch mwen san souf
Li fin fatige men m’
Li voye pye m’tout kote
Li fòse nen m’toujou chache odè w
Li fè zòrè mwen tounen tizè vwa w

Kè m’pa menm konn li
Men l’toujou bezwen ekri
Li vòlè tout konesans sèvo m’
Pou l’fè ou kwè li konn ekri bèl pwezi
Li tèlman anvi chame w!
Li pa menm wont pou yo pa rele l’kopyadò
Kè m’tizè kòw cheri
Li tizè w

Kè m’tizè cheri
M’trò piti pou m’kenbe l’
Tout sa m’fè l’pa tande m’
Li ret kwè se sèl non w’ki vle di fanm
Li pa vle dakò se youn sèl Dye moun adore
Li di “sèl si se ta ou menm”
Kè m’tizè kow cheri
Li tizè w
Ou wè jan l’fou cheri
Li pa menm pè blasfeme
Li jire paradi pa l’se bò kote w
Lanfè l’se lè w’bal do
Lè l’rete li depale
Li menm panse san ou l’manke moso
Kè m’tizè kow cheri
Li tizè w

Lè m’bezwen dòmi
Li vle panse
Li bliye si l’pa save
M’pa konn a kisa l’ap reflechi
Lè pou m’leve
Li poko fin reve
Kè m’tizè kòw cheri
Li tizè w

Li di libete pa l’
Se lè ou pran l’pou esklav
Li kwè se yon lonè
Si w’pran l’pou tchoul
Li panse l’ap tout pisan
Paske ou se fos li
Kè m’tizè kòw cheri
Li tizè w